احمد عفيفي يكتب : هى كانت ثورة ولا مؤامرة ... ولا مؤامرة انقلبت ثورة .. ؟!!
احمد عفيفي يكتب : هى كانت ثورة ولا مؤامرة ... ولا مؤامرة انقلبت ثورة .. ؟!!
يوم ما مرتضى منصور حلف اليمين مجبرا في مجلس الشعب .. كان عايز يشيل من الدستور نصا يقر ويعترف ان 25 يناير 2011 كانت ثورة .. والا مش حيقسم على احترام دستور البلاد .. وفي رأيه انها كانت نكسة وخراب مابعده خراب على البلد.
بس ده مرتضى منصور .. يتفلق ويخبط راسه في الحيط .. لكن اللي مأثر فيا بجد وحازز في نفسي اوي .. ان الدولة نفسها تحتفل بعيد الشرطة في 25 يناير وتزيل تماما ولا تشير الى الثورة اللي مات فيها واستشهد اكتر من الف بني ادم مصري.
معنى كده ان النظام شايفها مش ثورة .. ومش عايز يتعامل معاها كحدث على انها ثورة .. وأنكرها تماما وحذفها من التاريخ لأن الاخوان ركبوها وجم عن طريقها للحكم.
..........
قارئ صديق محترم علق على البوست التنويهي للمقال تعليقا مؤثرا جدا وكتب : استحلفك بحق الشهداء اللي ماتوا في الثورة متكتبش حاجة تضيع حقهم.. وقارئ تاني كتب لي : بلاش تتكلم في الموضوع ده .. فأيا كان رأيك ثورة او مؤامرة فلن يرضي الطرفين.
بس انا حاكتب واجري على الله .. لأني عشت أيام الثورة لحظة بلحظة رغم اني كنت وقتها في الكويت .. لكن احساسي وقتها اني في ميدان التحرير .. ولو كنت في مصر مكنتش سيبت الميدان .. الا رافع راسي مع الملايين واما مرفوع على أكتافهم كواحد من ضمن الشهداء.
انا فاكر وقتها اني كتبت مقال طويل جدا عنوانه : كنت معهم في ميدان التحرير .. اقسم بالله العظيم كتبته وانا بعيط .. ومش قادر اسيطر على دموعي ابدا .. كان مبارك مشي وغار في داهية والثورة نجحت .. وحسيت وقتها ان كرامتي رجعت لي ورقبتي طالت عنان السماء.
...........
عايز اقولكم اني كلمت بعد الثورة اخو وائل غنيم في التليفون وقلت له بالحرف الواحد : قول لاخوك ان راجل عنده ستين سنة كل امله قبل مايموت انه يسلم عليك ويبوس ايديك.
فيه صراحة اكتر من كده .. ؟ .. كنت فاكره شاب مصري بجد وجدع وبايع نفسه عشان قضية بلده .. واتضح لي بعدين انه كان موظف تم اختياره لشطارته في تكنولوجيا وسائل التواصل عشان يوصلوا للي هما مخططين له .. ومش لوحده .. بتوع 6 أبريل واللي اسمها أسماء محفوظ والتانية اللي اسمها إسراء عبد الفتاح .. كانوا ساعتها أيقونة الثورة والنموذج الأمثل لشبابها .. ومش حاضحك عليكم .. كتبت مقالات غزل في اللي اسمها أسماء محفوظ والست إسراء .. وحسيت بعدين زي كتير اوي ماحسوا اني انضحك عليا .. واللي عاملين نفسهم ثورجية شوية عرر ولاد كلب قابضين من بره تمن اللي عملوه.
..........
يعني خلاص خلصت على كده وعرفنا الفولة؟ .. لأ .. مخلصتش .. هى بدأت مؤامرة اكيد .. بس احنا والملايين صدقنا انها ثورة .. فنزلنا وبقت فعلا ثورة .. بل اعظم ثورة في تاريخك يامصر.
محدش من بتوع المؤامرة مات في الميدان .. اللي ماتوا بجد اللي نزلوا وقلبهم واجعهم من نظام ( وسخ ) برك على قلبنا وصدرنا 30 سنة .. وكان لازم يمشي .. الفرحة اللي كانت في عيون شباب التحرير كانت فرحة حقيقية ومش مفتعلة .. حسوا انهم نجحوا وضحوا بكتير من أصحابهم واخواتهم عشان لحظة الخلاص دي .. اللي كتبت عنها في نهاية مقالي ( كنت معهم في ميدان التحرير ) : ورأيت لأول مرة علم مصر مرفوعا مرفرفا مزهوا كما لم أره بهذه القامة من سنين .. ورحت أردد مع الملايين : اتقويت ورفعت الراس وبكيت فرحة وشوق وحماس .. وبقيت ماشي في وسط الناس متباهي بوطني فرحان .. بالاحضان بالأحضان بالأحضان.
...........
ليه بقى مش عايزين تعترفوا بيها انها كانت ثورة ؟ .. استشهد فيها شباب وبنات من خيرة ولادنا .. على الأقل افتكروهم .. واقروا لهم الفاتحة .. انما احتفل النهارده بعيد الشرطة بس .. وانسى تماما ان يوم 25 يناير كان يوم فارق في تاريخ البلد .. حرام ومش من العدل .. قولوا لنا اللي حصل واللي عرفناه .. بس اشكروا حتى المتآمرين الأندال لأنهم ضحكوا علينا وصدقناهم .. فنزلنا من بيوتنا وقلبنا المشهد التمثيلي بتاعهم اللي قبضوا تمنه ؛ لمشهد حقيقي واقعي مافيهوش لحظة .. لحظة واحدة كنا بنمثل فيها اننا كرهنا نظام مبارك .. وبنحب ونعشق ترابك يامصر.
..........
عرفنا بعد كده ان الإخوان ركبوا الثورة وسرقوها ( ملعون ابوهم في الأرض) .. بس كان لازم نسأل نفسنا الأول مين اللي جاب الإخوان وخلا صوتهم يعلا وياخدوا 88 مقعد في مجلس الشعب 2005؟ .. مش مبارك ولا حد تاني منعرفهوش؟ .. ماهو كونكم مش عايزين تعتبروها ثورة وكانت نكسة زي ماكتير بيقولوا عنها .. كنا بنحاكم مبارك ليه هو وولاده ؟ .. انا اللي اعرفه ان يوم ما اكتشف ان اللي حصل مش ثورة حقيقية وكانت فعلا مؤامرة امريكية .. الأمر البديهي في لحظتها ان مبارك يرجع الحكم تاني ونعتذر له كلنا ونبوس جزمته عشان يسامحنا. لكن - وخدوا بالكم من لكن دي - لولا الملايين اللي نزلت الميدان عن يقين تام .. لولا مبارك خلع من الحكم .. يعني غصب عنكم كانت ثورة .. وان كان لها فايدة حقيقية فكفاية انها جابت الإخوان اللي كانوا بعيد عن عنينا ومنعرفش عنهم غير انهم مضطهدين ومظلومين.. وكتير مننا كان بيتعاطف معاهم .. فلما مسكوا الحكم .. ظهروا على حقيقتهم ومبقيناش طايقنهم ع الارض ماشيين .. فقمنا بثورة 30 يونيو ( الأقل في صدقها وعفويتها من 25 يناير ) .. بمعنى ان اللي نزلوا في 2011 نزلوا بتلقائية شديدة دون ترتيب ولا اتفاق مسبق .. لكن 30 يونيو اتخطط لها - وده مش عيب على فكرة - فنجحت واطاحت بالإخوان الى غير رجعة بإذن الله.
.............
عموما ... انا عن نفسي .. كلامي عجب ناس او معجبش .. مؤمن تماما ان 25 يناير ثورة حقيقية عفوية وليدة الخاطر واللحظة .. عشان كده بعتبرها اعظم ثورة في تاريخنا كله .. أعظم كمان من يوليو 52 اللي اطاحت بالنظام الملكي .. وجه عبد الناصر ولو مكنش مات كان فاضل حاكمنا لحد النهارده .. والسادات لو مكنش اتقتل كان برضه قعد لحد يومنا هذا .. ومبارك لولا شباب مصر الرجالة بجد .. كان ساب الحكم لابنه وكأننا لسه في عهد محمد علي والملك فاروق.
............
انتوا حريين .. مش عايزين تعترفوا انها ثورة براحتكم .. انا عن نفسي عايشها وعايش لحظاتها لحد النهارده .. وتأثرت بيها وكتبت فيها أفضل ما كتبت في حياتي .. قابلت شهدائها في الجنة في مقالة طويلة ممتعة ومبكية ومفرحة كان عنوانها ( 5 ساعات في الجنة مع شهداء التحرير ) .. شفتهم يومها في الجنة فرحانين اوي وعايشين عيشة مش ممكن اعرف اوصفها لكم .. بس لو عملتها وقابلتهم تاني النهارده .. رغم انهم في الجنة ونعيمها .. مظنش حلاقيهم بنفس السعادة لما شفتهم اول مرة .. حلاقي في عيونهم عتاب موجع .. وسؤال واحد فيها من المرارة الكثير : لما هى مكنتش ثورة زي مانتوا بتقولوا النهارده .. أمال احنا متنا ليه وسيبنا عيالنا وامهاتنا وآهالينا .. معقولة يجي 25 يناير وتفتكروا بس ضباط الشرطة .. من غير ماتجيبوا سيرتنا وتترحموا علينا وتقروا لنا الفاتحة؟
يا أخي اذا مكنش عشان خاطرنا .. فاقروها عشان خاطر أهلنا .. على الأقل حيصدقوا اننا شهداء بجد .. واننا مضحيناش بحياتنا ورمينا الدنيا ورا ضهرنا عشان مؤامرة غيرنا قبض تمنها .. ولسه عايشين.
عموما .. نحمد ربنا اننا متنا ونلنا الشهادة .. اللي انتم مستكترينها علينا النهارده .. ومجبتوش سيرتنا .. لا بكلمة حلوة .. ولا كلمة وحشة.
كفاية اوي التجاهل .. كتر خيركم .. وربنا يسامحكم.
...........
يالا .... سلام.
يوم ما مرتضى منصور حلف اليمين مجبرا في مجلس الشعب .. كان عايز يشيل من الدستور نصا يقر ويعترف ان 25 يناير 2011 كانت ثورة .. والا مش حيقسم على احترام دستور البلاد .. وفي رأيه انها كانت نكسة وخراب مابعده خراب على البلد.
بس ده مرتضى منصور .. يتفلق ويخبط راسه في الحيط .. لكن اللي مأثر فيا بجد وحازز في نفسي اوي .. ان الدولة نفسها تحتفل بعيد الشرطة في 25 يناير وتزيل تماما ولا تشير الى الثورة اللي مات فيها واستشهد اكتر من الف بني ادم مصري.
معنى كده ان النظام شايفها مش ثورة .. ومش عايز يتعامل معاها كحدث على انها ثورة .. وأنكرها تماما وحذفها من التاريخ لأن الاخوان ركبوها وجم عن طريقها للحكم.
..........
قارئ صديق محترم علق على البوست التنويهي للمقال تعليقا مؤثرا جدا وكتب : استحلفك بحق الشهداء اللي ماتوا في الثورة متكتبش حاجة تضيع حقهم.. وقارئ تاني كتب لي : بلاش تتكلم في الموضوع ده .. فأيا كان رأيك ثورة او مؤامرة فلن يرضي الطرفين.
بس انا حاكتب واجري على الله .. لأني عشت أيام الثورة لحظة بلحظة رغم اني كنت وقتها في الكويت .. لكن احساسي وقتها اني في ميدان التحرير .. ولو كنت في مصر مكنتش سيبت الميدان .. الا رافع راسي مع الملايين واما مرفوع على أكتافهم كواحد من ضمن الشهداء.
انا فاكر وقتها اني كتبت مقال طويل جدا عنوانه : كنت معهم في ميدان التحرير .. اقسم بالله العظيم كتبته وانا بعيط .. ومش قادر اسيطر على دموعي ابدا .. كان مبارك مشي وغار في داهية والثورة نجحت .. وحسيت وقتها ان كرامتي رجعت لي ورقبتي طالت عنان السماء.
...........
عايز اقولكم اني كلمت بعد الثورة اخو وائل غنيم في التليفون وقلت له بالحرف الواحد : قول لاخوك ان راجل عنده ستين سنة كل امله قبل مايموت انه يسلم عليك ويبوس ايديك.
فيه صراحة اكتر من كده .. ؟ .. كنت فاكره شاب مصري بجد وجدع وبايع نفسه عشان قضية بلده .. واتضح لي بعدين انه كان موظف تم اختياره لشطارته في تكنولوجيا وسائل التواصل عشان يوصلوا للي هما مخططين له .. ومش لوحده .. بتوع 6 أبريل واللي اسمها أسماء محفوظ والتانية اللي اسمها إسراء عبد الفتاح .. كانوا ساعتها أيقونة الثورة والنموذج الأمثل لشبابها .. ومش حاضحك عليكم .. كتبت مقالات غزل في اللي اسمها أسماء محفوظ والست إسراء .. وحسيت بعدين زي كتير اوي ماحسوا اني انضحك عليا .. واللي عاملين نفسهم ثورجية شوية عرر ولاد كلب قابضين من بره تمن اللي عملوه.
..........
يعني خلاص خلصت على كده وعرفنا الفولة؟ .. لأ .. مخلصتش .. هى بدأت مؤامرة اكيد .. بس احنا والملايين صدقنا انها ثورة .. فنزلنا وبقت فعلا ثورة .. بل اعظم ثورة في تاريخك يامصر.
محدش من بتوع المؤامرة مات في الميدان .. اللي ماتوا بجد اللي نزلوا وقلبهم واجعهم من نظام ( وسخ ) برك على قلبنا وصدرنا 30 سنة .. وكان لازم يمشي .. الفرحة اللي كانت في عيون شباب التحرير كانت فرحة حقيقية ومش مفتعلة .. حسوا انهم نجحوا وضحوا بكتير من أصحابهم واخواتهم عشان لحظة الخلاص دي .. اللي كتبت عنها في نهاية مقالي ( كنت معهم في ميدان التحرير ) : ورأيت لأول مرة علم مصر مرفوعا مرفرفا مزهوا كما لم أره بهذه القامة من سنين .. ورحت أردد مع الملايين : اتقويت ورفعت الراس وبكيت فرحة وشوق وحماس .. وبقيت ماشي في وسط الناس متباهي بوطني فرحان .. بالاحضان بالأحضان بالأحضان.
...........
ليه بقى مش عايزين تعترفوا بيها انها كانت ثورة ؟ .. استشهد فيها شباب وبنات من خيرة ولادنا .. على الأقل افتكروهم .. واقروا لهم الفاتحة .. انما احتفل النهارده بعيد الشرطة بس .. وانسى تماما ان يوم 25 يناير كان يوم فارق في تاريخ البلد .. حرام ومش من العدل .. قولوا لنا اللي حصل واللي عرفناه .. بس اشكروا حتى المتآمرين الأندال لأنهم ضحكوا علينا وصدقناهم .. فنزلنا من بيوتنا وقلبنا المشهد التمثيلي بتاعهم اللي قبضوا تمنه ؛ لمشهد حقيقي واقعي مافيهوش لحظة .. لحظة واحدة كنا بنمثل فيها اننا كرهنا نظام مبارك .. وبنحب ونعشق ترابك يامصر.
..........
عرفنا بعد كده ان الإخوان ركبوا الثورة وسرقوها ( ملعون ابوهم في الأرض) .. بس كان لازم نسأل نفسنا الأول مين اللي جاب الإخوان وخلا صوتهم يعلا وياخدوا 88 مقعد في مجلس الشعب 2005؟ .. مش مبارك ولا حد تاني منعرفهوش؟ .. ماهو كونكم مش عايزين تعتبروها ثورة وكانت نكسة زي ماكتير بيقولوا عنها .. كنا بنحاكم مبارك ليه هو وولاده ؟ .. انا اللي اعرفه ان يوم ما اكتشف ان اللي حصل مش ثورة حقيقية وكانت فعلا مؤامرة امريكية .. الأمر البديهي في لحظتها ان مبارك يرجع الحكم تاني ونعتذر له كلنا ونبوس جزمته عشان يسامحنا. لكن - وخدوا بالكم من لكن دي - لولا الملايين اللي نزلت الميدان عن يقين تام .. لولا مبارك خلع من الحكم .. يعني غصب عنكم كانت ثورة .. وان كان لها فايدة حقيقية فكفاية انها جابت الإخوان اللي كانوا بعيد عن عنينا ومنعرفش عنهم غير انهم مضطهدين ومظلومين.. وكتير مننا كان بيتعاطف معاهم .. فلما مسكوا الحكم .. ظهروا على حقيقتهم ومبقيناش طايقنهم ع الارض ماشيين .. فقمنا بثورة 30 يونيو ( الأقل في صدقها وعفويتها من 25 يناير ) .. بمعنى ان اللي نزلوا في 2011 نزلوا بتلقائية شديدة دون ترتيب ولا اتفاق مسبق .. لكن 30 يونيو اتخطط لها - وده مش عيب على فكرة - فنجحت واطاحت بالإخوان الى غير رجعة بإذن الله.
.............
عموما ... انا عن نفسي .. كلامي عجب ناس او معجبش .. مؤمن تماما ان 25 يناير ثورة حقيقية عفوية وليدة الخاطر واللحظة .. عشان كده بعتبرها اعظم ثورة في تاريخنا كله .. أعظم كمان من يوليو 52 اللي اطاحت بالنظام الملكي .. وجه عبد الناصر ولو مكنش مات كان فاضل حاكمنا لحد النهارده .. والسادات لو مكنش اتقتل كان برضه قعد لحد يومنا هذا .. ومبارك لولا شباب مصر الرجالة بجد .. كان ساب الحكم لابنه وكأننا لسه في عهد محمد علي والملك فاروق.
............
انتوا حريين .. مش عايزين تعترفوا انها ثورة براحتكم .. انا عن نفسي عايشها وعايش لحظاتها لحد النهارده .. وتأثرت بيها وكتبت فيها أفضل ما كتبت في حياتي .. قابلت شهدائها في الجنة في مقالة طويلة ممتعة ومبكية ومفرحة كان عنوانها ( 5 ساعات في الجنة مع شهداء التحرير ) .. شفتهم يومها في الجنة فرحانين اوي وعايشين عيشة مش ممكن اعرف اوصفها لكم .. بس لو عملتها وقابلتهم تاني النهارده .. رغم انهم في الجنة ونعيمها .. مظنش حلاقيهم بنفس السعادة لما شفتهم اول مرة .. حلاقي في عيونهم عتاب موجع .. وسؤال واحد فيها من المرارة الكثير : لما هى مكنتش ثورة زي مانتوا بتقولوا النهارده .. أمال احنا متنا ليه وسيبنا عيالنا وامهاتنا وآهالينا .. معقولة يجي 25 يناير وتفتكروا بس ضباط الشرطة .. من غير ماتجيبوا سيرتنا وتترحموا علينا وتقروا لنا الفاتحة؟
يا أخي اذا مكنش عشان خاطرنا .. فاقروها عشان خاطر أهلنا .. على الأقل حيصدقوا اننا شهداء بجد .. واننا مضحيناش بحياتنا ورمينا الدنيا ورا ضهرنا عشان مؤامرة غيرنا قبض تمنها .. ولسه عايشين.
عموما .. نحمد ربنا اننا متنا ونلنا الشهادة .. اللي انتم مستكترينها علينا النهارده .. ومجبتوش سيرتنا .. لا بكلمة حلوة .. ولا كلمة وحشة.
كفاية اوي التجاهل .. كتر خيركم .. وربنا يسامحكم.
...........
يالا .... سلام.