قصائد عشق تنزف

الشاعر محمد علي

الليل وقصايد شعر بتنزف
تفتح كل ساعات الحلم وترسم طاقة فجر
وحبة سحر
تلون كل مساحة روحي
مشتاقة جروحي تحس بإن السما مش بس نجوم
وغرام
وحاجات مش واصله لقلب العاشق بحروف وكلام
السما افراح بتضم حياتي ف رحلة بتبدأ لحظة موت
وسكوت الصوت الزاعق فيا ف وقت ماليه النور أحلام
وسلام على وقت الشوق المخنوق صبر
بلاده حدودها براح الكون المسجون جوه القلب
ونقطة فَرْح تعافر بين النسمه وبين الفجر
تشقشق جنب بواقي الذكرى
وانا بين الهم وبين الفكره بالاقي الوقت طويل
الليل
وقصايد عشق بتنزف