عفاف أحمد التركى ما مسحتش رقمك من عندى يا بابا فؤاد
عفاف أحمد التركى
ما مسحتش رقمك من عندى يا بابا فؤاد
........ ......... ......... ........... ...........
مستعجل ليه؟
كان بينّا ميعاد
كان نفسي اشوفك بابا فؤاد
وارتاح للنظرة اللي في عينك
وانت بتقرألي فـ اشعارك
وانا قعدة اتفزّز فـ مكاني
.. وباقول اااالله
القطر اللي مسافر بيكم
ماخطرش،في باله ياخدني معاه؟
بلد الغاليين اللي مفارقين
ما صعبش عليه حزن مالينا
وانتوا مسافرين ؟
ما عملش حساب اصحي من النوم
علي حد عزيز يقطع بينا ؟
القطر القشّاش ..متعوّد
علي دمع غيابكم فـ عينينا ؟
..بيصفّر توووووت ..
عمر وبيفوت يطرح فينا
ما بيستناش نركب صحبة
ونغني كام غنوة حزينة ؟
تصبّر وجع القلب عليك ..
ارجع يا غريب..
ونسك موجود وسط كلامك
عشمك متعشّم ..يحكي لنا
عن عرق العمّال والثورة
وكأن عيونك شقّت غيب
وفي عيد الثورة تموت وحدك
من غير ما تودّع فينا غريب
وكإن لسان حالك..بيقول
الجسم مريض..والفكر طبيب
انا سايب ليكم يا ولادي
الطبل البلدي اللي اتفرّق
نوتة أحزان
ليل المحروسة وغناويها
لشاعر عشمان
وانت .. اللي تمّلي بسؤالتك
بتوارب باب الدمع عليك
( مين فينا جاي مرساها ..مين رااايح؟ )
واحنا اللي ما فهمناش
واحنا اللي مش داريين
شعرك بيتسطّح ..
علي ظهر بني آدمين
شايلاك غُنا ..وتقاسيم
شايلاك نغم..وأنين
شايلاك وطن أخضر ..
طارح سلام ورحيم
حنّن يا موت قلبك ..
قل لي البقاء لله..
لو عزّي فيه الشِعر
والاّ انبكي معناه
آخره..يدمّع فيك
لو جت في يوم سيرة
الصبر ..تصبيرة
تحويجة م المخصوص
علي شعر متطعّم..
احجار عقيق وفاروز
وبنقشة الارآبيسك..
يجعل ختاااامك ..مِسك
هناك مافيش محاسيب
لا خيار ..ولا فاقّوس
هناك..فتح لك قوس
ضِمن اللي مش راجعين
هناك..ونس غيرنا
وبنتولد فاهمين.
.............................
عفاف التركي
#أسألكم له الفاتحة والدعاء أصدقائي